Xəbərlər

“Təhsil” istirahət mərkəzində tələbələr üçün ixtisas yönümlü qış düşərgələri yekunlaşıb

Elm və Təhsil İşçiləri Həmkarlar İttifaqı və “Bir Könüllü” Tələbələrin Əməkdaşlığı İctimai Birliyinin birgə təşkilatçılığı ilə tələbələr üçün 5-9 fevral tarixlərində keçirilən ənənəvi ixtisas yönümlü qış düşərgələri yekunlaşıb.

“Təhsil” İstirahət Mərkəzində baş tutan düşərgələrin əsas məqsədi iştirakçıların ixtisas biliklərinin dərinləşdirilməsi, analitik və tənqidi düşünmə, problem həll etmə, innovativ yanaşma, eləcə də liderlik və komanda işi bacarıqlarının inkişaf etdirilməsi olub. Layihə çərçivəsində gənclərin gələcək akademik və peşəkar fəaliyyətə hazırlıq səviyyəsinin artırılması prioritet kimi müəyyən edilib.

Cari il üzrə düşərgələr iki istiqaməti əhatə edib. Riyaziyyat sahəsi üzrə “MathCamp2026” layihəsi “Bir Könüllü” Tələbələrin Əməkdaşlığı İctimai Birliyi, Elm və Təhsil İşçiləri Həmkarlar İttifaqı və “PathtoMath” Həvəskar Riyaziyyatçılar Klubunun birgə təşkilatçılığı ilə həyata keçirilib. Texnologiya və mühəndislik istiqamətləri üzrə “TechCamp2026” düşərgəsi isə “ESTIEM LG Baku” və “EESTEC LG Baku” təşkilatlarının tərəfdaşlığı çərçivəsində təşkil olunub.

Düşərgələrdə seçim mərhələsindən keçmiş riyaziyyat, texnologiya, mühəndislik və əlaqəli sahələr üzrə təhsil alan əlli nəfərə yaxın perspektivli tələbə iştirak edib. Proqram çərçivəsində ixtisaslaşmış təlimlər, praktiki məşğələlər, layihə əsaslı fəaliyyətlər və mentorluq görüşləri keçirilib.

Qeyd edək ki, Elm və Təhsil İşçiləri Həmkarlar İttifaqı gənclərin bilik və bacarıqlarının inkişafına yönəlmiş tədris və innovasiya yönümlü təşəbbüslərin həyata keçirilməsinə davamlı dəstək göstərir.

ETİHİ Respublika Komitəsi tərəfindən 700-dən çox ittifaq üzvü üçün ekskursiya və turlar təşkil olunub

Elm və Təhsil İşçiləri Həmkarlar İttifaqı Respublika Komitəsi tərəfindən yanvar ayı ərzində 700 nəfərdən çox ittifaq üzvü üçün ekskursiya və turlar təşkil olunub.

Belə ki, 533 nəfər təhsil işçisi rayon və şəhər komitələrinin təşkilatçılığı ilə Quba, Qusar, Qəbələ, Şamaxı və Astara rayonlarına təşkil edilmiş bir neçə günlük turlardan yararlanaraq istirahət ediblər.

168 nəfər təhsil işçisi isə "İçərişəhər" Tarix-Memarlıq Qoruğuna və açıq səma altında yerləşən Qala Etnoqrafiya Muzeyinə ekskursiya ediblər.

Qeyd edək ki, bu cür maarifləndirici və istirahət xarakterli gəzintilər gələcəkdə də mütəmadi olaraq təşkil ediləcəkdir.

“Azərbaycan Nəşriyyatları Assosiasiyası” İctimai Birliyində Həmkarlar İttifaqı təsis olunub

Azərbaycan Nəşriyyatları Assosiasiyasında Həmkarlar İttifaqı Komitəsinin təsis yığıncağı keçirilib. Təsis iclasında Assosiasiya nəzdində Həmkarlar İttifaqı Komitəsinin yaradılması ilə bağlı təşkilati məsələlər müzakirə olunub.

Tədbirdə Azərbaycan Nəşriyyatları Assosiasiyasının 14 nəfər əməkdaşı, həmçinin Elm və Təhsil İşçiləri Həmkarlar İttifaqı Respublika Komitəsi sədrinin müavini Mirzə Cəfərzadə və sədrin müşaviri Renata Mansurova iştirak ediblər.

Təsis iclasında Həmkarlar İttifaqı Komitəsinin və Təftiş Komissiyasının üzvləri, eləcə də komitənin sədri seçilib, yaradılan qurumun ETİHİ Respublika Komitəsinin xidmətinə qəbul edilməsi barədə qərar qəbul olunub.

Elm və Təhsil İşçiləri Həmkarlar İttifaqı Respublika Komitəsi yeni üzvləri ilə birgə həmrəyliyə əsaslanan fəaliyyət istiqamətini davam etdirməkdədir.

Yanvar ayında yollayışlardan yararlananların statistikası

Elm və Təhsil İşçiləri Həmkarlar İttifaqı Respublika Komitəsi yanvar ayında ittifaq üzvlərinə sanatoriya-kurort yollayışları təqdim edərək onların Azərbaycan Həmkarlar İttifaqları Konfederasiyasının tabeliyindəki müalicə və istirahət mərkəzlərindən faydalanmasını təmin edib.

Ay ərzində ümumilikdə 449 nəfər yollayışdan yararlanıb. Onların 216 nəfəri ittifaq üzvü, qalanları isə ailə üzvləridir.

Yanvar ayında ilk həmkarlar təşkilatlarının sədrləri üçün keçirilən proqram çərçivəsində ailə üzvləri ilə birlikdə 92 nəfər 3 günlük müalicə paketindən yararlanıb.

Bununla yanaşı, rayon və şəhər komitələrinin təşkil etdiyi ekskursiyalara 165 nəfər ittifaq üzvü cəlb edilib.

2 fevral – Azərbaycan Gəncləri Günü münasibətilə Elm və Təhsil İşçiləri Həmkarlar İttifaqının rayon və şəhər komitələri tərəfindən tədbirlər keçirilib

2 fevral – Azərbaycan Gəncləri Günü münasibətilə Elm və Təhsil İşçiləri Həmkarlar İttifaqının rayon və şəhər komitələri tərəfindən tədbirlər keçirilib. Tədbirlərdə təhsil müəssisələrində çalışan gənc həmkarlar ittifaqı üzvləri, müəllimlər və ictimai fəallar iştirak ediblər.

Tədbir çərçivəsində gənclərin fikir və təklifləri dinlənilib, onları maraqlandıran məsələlər ətrafında səmimi müzakirələr aparılıb. Fəallığı ilə seçilən gənclər mükafatlandırılıb, onlara gələcək fəaliyyətlərində uğurlar arzulanıb.

Elm və Təhsil İşçiləri Həmkarlar İttifaqı Nəsimi Rayon Komitəsində 2 Fevral – Gənclər Günü münasibətilə tədbir keçirilib.

Tədbirdə Komitənin üzv təşkilatlarında fəaliyyət göstərən gənc təhsil işçiləri iştirak ediblər. Elm və Təhsil İşçiləri Həmkarlar İttifaqı Nəsimi Rayon Komitəsinin sədri Reyhan Ocaqova tədbir iştirakçılarını 2 Fevral – Gənclər Günü münasibətilə təbrik edərək, ETİHİ sədri Araz Paşayevin salamlarını çatdırmış,peşəkar fəaliyyətlərində uğurlar arzulayıb. O, çıxışında gənclərin cəmiyyətin inkişafında və təhsilin gələcəyinin formalaşmasında mühüm rol oynadıqlarını vurğulayaraq, ölkənin parlaq gələcəyinin məhz gənclərin bu gün göstərdikləri əzm, bilik və təşəbbüskarlıqdan asılı olduğunu diqqətə çatdırıb. Səmimi və mehriban mühitdə keçən tədbir çərçivəsində iştirakçılar çay süfrəsi ətrafında fikir mübadiləsi aparıblar. Daha sonra ETİHİ Nəsimi Rayon Komitəsinin sədri Reyhan Ocaqova gənc təhsil işçilərini fəal ictimai mövqelərinə və əmək fəaliyyətlərinə görə qiymətli hədiyyələr, gül dəstələri və Fəxri Fərmanlarla təltif edib. Tədbir gənclərin xatirə şəkillərinin çəkilməsi ilə başa çatıb.

BDU-da “Güclü dövlətin təməli – Azərbaycan gəncliyi” forumu keçirilib

Gənclər və İdman Nazirliyi və Bakı Dövlət Universitetinin birgə təşkilatçılığı ilə 2 fevral – Azərbaycan Gəncləri Gününə həsr olunmuş Ümummilli Lider Heydər Əliyevin gənclər siyasəti və Prezident İlham Əliyevin gələcəyə strateji baxışı kontekstində “Güclü dövlətin təməli - Azərbaycan gəncliyi” adlı forum keçirilib.

Forumdan əvvəl gənclər və könüllü təşkilatlarının, gənclər evlərinin təcrübə və könüllülük proqramlarının sərgisinə baxış olub.

Forumun açılış mərasimində Dövlət himni səsləndirilib, torpaqlarımızın azadlığı uğrunda həlak olan şəhidlərimizin əziz xatirəsi bir dəqiqəlik sükutla yad edilib.

Forumda BDU rektoru Elçin Babayev, Gənclər və İdman naziri Fərid Qayıbov, Gənclər Fondunun icraçı direktoru vəzifəsini icra edən Yusif Vəliyev və BDU məzunları çıxış edərək ölkəmizin gənclər siyasətinin uğurlarından danışıb, gənclərin təhsil, idman və ictimai fəaliyyət sahələrindəki rolunu vurğulayıblar.

Tədbir çərçivəsində “İlin gənc alimi” müsabiqəsinin nəticələri elan olunub, fəal tələbələrə təşəkkürnamələr təqdim edilib, Azərbaycan Gəncləri Günü münasibətilə bədii kompozisiya nümayiş olunub və “Dövlətçilik, təhsil və elm: Azərbaycan gəncliyinin strateji missiyası” mövzusunda panel müzakirə keçirilib.

ETİHİ-nin sədr müavini Mirzə Cəfərzadə Həmkarlar İttifaqı Komitəsinın fəaliyyətində aktiv olan tələbələrin mükafatlandırılmasında iştirak edib. 

ETİHİ-nin əməkdaşları SƏTƏM təlimində iştirak ediblər

AHİK-in Əmək və Sosial Münasibətlər Akademiyasında, Elm və Təhsil İşçiləri Həmkarlar İttifaqının dəstəyi ilə təhlükəsiz əmək mühitinin qurulmasına yönəlmiş beynəlxalq səviyyəli “IOSH Təhlükəsiz İdarəetmə” təlimi təşkil edilib. Təlimdə Elm və Təhsil İşçiləri Həmkarlar İttifaqı Respublika Komitəsinin 13 əməkdaşı iştirak edib.

Təlim proqramı iştirakçıların SƏTƏM sahəsində biliklərini artırmaq, risklərin idarə edilməsi, iş mühitində təhlükəsizlik mədəniyyətinin gücləndirilməsi və qabaqcıl təcrübələrin tətbiqi istiqamətində bacarıqlarını inkişaf etdirməyə xidmət edib.

Açılışda Azərbaycan Əmək və Sosial Münasibətlər Akademiyasının rektor vəzifəsini müvəqqəti icra edən Fərid Babayev beynəlxalq standartlara uyğun təşkil olunan təlimin məqsədinin əmək mühitində təhlükəsizlik və sağlamlığın qorunması, risklərin effektiv idarə edilməsi və müəssisələrdə təhlükəsizlik mədəniyyətinin gücləndirilməsi olduğunu bildirib.

Elm və Təhsil İşçiləri Həmkarlar İttifaqı Respublika Komitəsinin sədr müavini Mirzə Cəfərzadə çıxış edərək iştirakçılara iş yerində risklərin qiymətləndirilməsi, təhlükəsizlik siyasətinin tətbiqi və fövqəladə hallarda görüləcək tədbirlər üzrə biliklərin artırılmasında uğurlar arzulayib.

Təlimi uğurla tamamlayan iştirakçılara beynəlxalq sertifikatlar təqdim edilib.

Elm və Təhsil İşçiləri Həmkarlar İttifaqı bu istiqamətdə Azərbaycan Həmkarlar İttifaqları Konfederasiyası ilə təhsil sahəsində çalışan ittifaq üzvlərinin təhlükəsiz şəraitdə işləməsi və iş yerlərində əməyin mühafizəsi üzrə təlimatlara ciddi əməl edilməsi məsələlərini diqqət mərkəzində saxlamağa çalışır.

Gürcüstanda “Cəmiyyətə açıq olaq! Təhsili maliyyələşdirək” kampaniyası çərçivəsində tədbir keçirilib

Yanvarın 20–21-də Gürcüstanın paytaxtı Tbilisi şəhərində Təhsil üzrə Avropa Həmkarları İttifaqı Komitəsinin təşəbbüsü ilə “Cəmiyyətə açıq olaq! Təhsili maliyyələşdirək” (Go Public! Fund Education) kampaniyası çərçivəsində sub-regional görüş keçirilib.

Tədbirdə Azərbaycan, Gürcüstan, Ermənistan, Qazaxıstan, Özbəkistan, Tacikistan və Qırğızıstanın təhsil işçiləri həmkarlar ittifaqlarının rəhbərləri və nümayəndələri iştirak ediblər.

Görüşdə təhsil işçilərinin əmək və sosial şəraitinin yüksəldilməsi, onlara hərtərəfli sosial dəstəyin göstərilməsi, peşəkar inkişaf imkanlarının genişləndirilməsi, təhsilin maliyyələşdirilməsi və davamlı sosial dialoq mexanizmlərinin təkmilləşdirilməsi məsələləri müzakirə olunub.

Tədbirdə çıxış edən Gürcüstanın elm, təhsil və gənclər naziri Givi Mikanadze, Beynəlxalq Təhsil Birliyinin “Go Public! Fund Education” kampaniyası üzrə koordinatoru Angelo Gavrielatos və Təhsil üzrə Avropa Həmkarları İttifaqı Komitəsinin direktoru Jelmer Evers UNESCO və BMT-nin müəllimlik peşəsi ilə bağlı tövsiyələrindən və bu sahədə qlobal çağırışlardan danışıblar.

Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsinin sədri Araz Paşayev tədbirdə sürətli rəqəmsallaşmanın əmək bazarına təsirləri, Azərbaycanda müəllimlərin işə qəbulu və sertifikatlaşdırma mexanizmləri, eləcə də təhsil sahəsində həyata keçirilən peşəkar inkişaf proqramları barədə məlumat verib. 

Araz Paşayev həmçinin son bir il ərzində Respublika Komitəsinin reallaşdırdığı sosial layihələrdən bəhs edib, elm və təhsil işçilərinə göstərilən dəstək tədbirləri və təqdim olunan xidmətlərə əlçatanlıqdan danışıb.

Görüşün yekununda sub-regional əməkdaşlığın genişləndirilməsi və növbəti iclasın bu ilin oktyabr ayında Tacikistanda keçirilməsi qərarı qəbul edilib.

Qeyd edək ki, Təhsil üzrə Avropa Həmkarları İttifaqı Komitəsi 48 ölkədən 120 təşkilatı və 4,9 milyon ittifaq üzvünü birləşdirir. ETİHİ Respublika Komitəsi 2010-cu ildən bu qurumun üzvüdür.

Elm və Təhsil İşçiləri Həmkarlar İttifaqı Nəsimi Rayon Komitəsinin aparat işçiləri, üzv təşkilatların ilk həmkarlar ittifaqı sədrləri ilə birgə Şəhidlər Xiyabanını ziyarət ediblər 20 Yanvar – Ümumxalq Hüzn Günü münasibətilə Elm və Təhsil İşçiləri Həmkarlar İttifaqı Nəsimi Rayon Komitəsinin aparat işçiləri və üzv təşkilatların ilk həmkarlar ittifaqı sədrləri Şəhidlər Xiyabanını ziyarət ediblər.

Elm və Təhsil İşçiləri Həmkarlar İttifaqı Nəsimi Rayon Komitəsinin aparat işçiləri, üzv təşkilatların ilk həmkarlar ittifaqı sədrləri ilə birgə Şəhidlər Xiyabanını ziyarət ediblər

20 Yanvar – Ümumxalq Hüzn Günü münasibətilə Elm və Təhsil İşçiləri Həmkarlar İttifaqı Nəsimi Rayon Komitəsinin aparat işçiləri və üzv təşkilatların ilk həmkarlar ittifaqı sədrləri Şəhidlər Xiyabanını ziyarət ediblər.

Ziyarət zamanı 1990-cı ilin 20 Yanvar gecəsi Azərbaycan xalqının azadlıq və müstəqillik uğrunda apardığı mübarizə zamanı sovet ordusunun törətdiyi qanlı faciə nəticəsində həlak olmuş şəhidlərin əziz xatirəsi dərin hörmət və ehtiramla anılıb, məzarları üzərinə gül dəstələri düzülüb.

Qeyd edək ki, 20 Yanvar faciəsi Azərbaycan xalqının tarixində həm böyük hüzn, həm də qəhrəmanlıq səhifəsi kimi yadda qalıb. Həmin gecə günahsız insanların qətlə yetirilməsi xalqımızın azadlıq iradəsini sarsıtmaq məqsədi daşısa da, əksinə, milli müstəqillik ideyasının daha da möhkəmlənməsinə səbəb olub. Bu faciə Azərbaycan Respublikasının müstəqilliyinə gedən yolda dönüş nöqtəsi kimi qiymətləndirilir.

Tədbir iştirakçıları şəhidlərin xatirəsinin daim uca tutulmasının, gənc nəsillərə 20 Yanvar həqiqətlərinin çatdırılmasının vacibliyini vurğulayıblar.

Həmkarlar İttifaqlarına üzv olun, “AHİK Plus” layihəsinin imkanlarından yararlanın

Azərbaycan Həmkarlar İttifaqları Konfederasiyası tərəfindən istifadəyə verilən “AHİK Plus” tətbiqi həmkarlar ittifaqı üzvləri üçün nəzərdə tutulmuş müasir sosial dəstək və güzəşt platformasıdır. Tətbiq AHİK üzvlərinin gündəlik həyatında sosial və iqtisadi imkanların genişlənməsinə xidmət edir.

“AHİK Plus” layihəsinin əsas məqsədi həmkarlar ittifaqı üzvlərinin sosial rifahının yüksəldilməsi, onlara müxtəlif sahələr üzrə əlavə üstünlüklərin təqdim olunması və sosial təminat mexanizmlərinin gücləndirilməsidir. Layihə üzvlərin maddi imkanlarının qorunmasına, ailə büdcəsinə qənaət edilməsinə və sosial faydaların artırılmasına yönəlib.

Tətbiq çərçivəsində AHİK-in tərəfdaşı olan müəssisə və xidmət təminatçıları vasitəsilə üzvlərə xüsusi endirimlər, bonuslar və güzəştlər təqdim olunur. Bu imkanlar təhsil, səhiyyə, istirahət, səyahət, xidmət və alış-veriş sahələrini əhatə edir. “AHİK Plus” üzvlərə vahid platforma üzərindən bu üstünlüklərdən rahat v şəkildə yararlanmaq imkanı yaradır.

Nəsimi Rayon Komitəsində Ulu Öndər Heydər Əliyevin anadan olmasının 102-ci ildönümünə həsr edilmiş yarışların qalibləri mükafatlandırılıb.

Elm və Təhsil İşçiləri Həmkarlar İttifaqı Respublika Komitəsinin və Bakı Şəhər Təhsil İdarəsinin birgə təşkilatçılığı ilə Ulu Öndər Heydər Əliyevin anadan olmasının 102-ci ildönümünə həsr edilmiş yarışların şəhər mərhələsində dama və voleybol üzrə qalib gəlmiş Nəsimi Rayon Komitəsinin üzvü olan təhsil işçiləri üçün təqdimat tədbiri keçirilib.

Tədbirdə ETİHİ Nəsimi Rayon Komitəsinin sədri Reyhan Ocaqova qalibləri yeni təqvim ili münasibətilə təbrik edib, onlara möhkəm can sağlığı və peşə fəaliyyətlərində davamlı uğurlar arzulayıb. Daha sonra Elm və Təhsil İşçiləri Həmkarlar İttifaqı Respublika Komitəsi tərəfindən təsis edilmiş kubok, diplom və medallar qaliblərə təqdim olunub.

Təqdimat mərasimində Respublika Komitəsinin məsul işçisi Nadir Əliyev da iştirak edərək qalibləri səmimi sözlərlə təbrik edib, idman və ictimai fəallıqlarında yeni nailiyyətlər arzulayıb.

Tədbir çərçivəsində iştirakçılar üçün səhər yeməyi təşkil olunub. Səmimi və işgüzar mühitdə keçən görüş həm idman nailiyyətlərinin dəyərləndirilməsi, həm də kollektiv həmrəyliyin möhkəmlənməsi baxımından yadda qalıb.